स्वच्छता निरीक्षकाच्या तत्परतेमुळे नागरिकास मिळाला कचर्‍यात गेलेला दागिन्यांचा डबा

शिरूरनामा न्यूज नेटवर्क

       शिरूर शहर व उपनगरांमध्ये घंटागाडी द्वारे कचरा उचलला जातो.आज सकाळी स्टेट बँक कॉलनी येथे कचरा उचलण्यासाठी घंटागाडी आली असता तेथील नागरिक विद्याधाम प्रशालेचे अध्यापक छबन झावरे यांच्या घरातील चिमुकल्यांनी धान्याचे पीठ घंटागाडीत टाकले.या पिठामध्ये दागिने व रोख रक्कम होती.याबाबत चिमुकले हे अनभिज्ञ होते. घंटागाडी कचरा घेऊन तेथून निघून गेली.दुपारी तीन वाजण्याच्या दरम्यान पीठ व पिठा मधील दागिन्यांचा डबा जागेवर नसल्याचे झावरे यांच्या कुटुंबियांच्या निदर्शनास आले.यामुळे गोंधळलेल्या झावरे यांनी घरात याबाबत चर्चा केली असता, पीठ सकाळी घंटागाडीत टाकण्यात आल्याचे त्यांना समजले. हे समजताच झावरे यांनी नगरपरिषदेचे स्वच्छता निरीक्षक डी.टी.बर्गे यांच्याशी संपर्क साधून घडलेला प्रकार सांगितला.बर्गे यांनी त्वरित स्वच्छता ठेकेदार वसीम सय्यद यांच्याशी संपर्क साधला व अनावधानाने कचरा गाडीत दागिन्यांचा डबा टाकला गेल्याची माहिती दिली.नगरपरिषद स्वच्छता विभागाच्या वतीने कचरा डेपोवर कचऱ्याचे विलगीकरण केले जाते. यामुळे ठेकेदार वसीम यांनी दागिन्यांच्या डब्याचा शोध घेण्याचा प्रयत्न केला असता त्यांना तो डबा निदर्शनास आला.यावर त्यांनी त्वरित स्वच्छता निरीक्षक बर्गे यांना डबा सुरक्षित असल्याचे माहिती दिली.